ಲೋಕ ಕಾಪುನ ದೆಂಜಿ

ಈ ಬೂಮಿದ ನಾಲ್ ಸುತ್ತಲಾ ಕಡಲ್ ಉಂಡುಗೆ. ಈ ಕಡಲ್ಡ್ ಬೂಮಿಡ್ ಉಪ್ಪುನಾತೆ ಬಗೆತ ಮುರ್ಗೊ ಜಂತುಳು ಉಳ್ಳಗೆ.

ಬೂಮಿಡ್ ನಾಯಿ ಉಂಡಾ ನೀರ್ಡ್ ನೀರ್ನಾಯಿ ಉಂಡು. ಬೂಮಿಡ್ ಆನೆ ಉಂಡಾ ನೀರ್ಡ್ ನೀರಾನೆ ಉಂಡು. ಅಂಚಾದ್ ಕಡಲ್ಡ್ ಮೀನುಳು ಮಾತ್ರೆ ಉಪ್ಪುನವತ್ತ್ .

ಇಂಚಿತ್ತಿ ಕಡಲ್ಡ್ ಏತ್ ಮಲ್ಲ ಮೀನ್ ಉಂಡು ಏತ್ ಎಲ್ಯ ಮೀನ್ ಉಂಡುಂದ್ ಪನ್ಯೆರೆ ಮಿನಿ ಬಲ್ಲಿ. ಒಂಜಿ ಮೀನ್ ಮಾತ್ರೆ ಬಾರೀ ಮಲ್ಲವು. ಅವು ಈ ಬೂಮಿಗ್ ಸುತ್ತು ಪಾಡ್ದ್ ಉಂಡು. ಅಂಚಾದ್ ಅಯಿತ ಉದ್ದ ಏತ್ ಪಂಡ್ದ್ ಪನ್ಯೆರೆ ತೀರಂದ್. ಈ ಮೀನ್ದ ಬಾಯಿಗ್ ಅಯಿತ ಬೀಲ ಮುಟ್ಟುನಾತ್ ಅವು ಬಳತೊಂದು ಉಂಡು. ಆಂಡ ಏಪ ಅಯ್ತ ಬೀಲ ತರೆಕ್ ಮುಟ್ಟುವಾ ಆನಿಗೇ ಈ ಲೋಕ ಪ್ರಳಯ ಆಯಿಲೆಕೊ. ಅಪಗ ಬುಮಿಲಾ ಇಜ್ಜಿ ಬೂಮಿದ ಜುವ ಜಂತುಲ್ಲ ಇಜ್ಜ. ನಾಲೊರ್ಮೆ ಕಡಲೇ ಆದ್ ಪೋವು.

ಆಂಡ ಅಂಚ ಆಯೆರೆ ಬಲ್ಲಿದೆ. ಈ ಲೋಕ ಪ್ರಳಯ ಆಂಡ ಎಂಚ ? ಲೋಕ, ಲೋಕದ ಬದ್ಕ್ ಭಾಗ್ಯ ಒರಿಯೋಡು. ಅಯಿಕಾದ್ ಮಲ್ಲ ಒಂಜಿ ದೆಂಜಿ ಕಾತೊಂದೆ ಉಪ್ಪು. ಎಪೊ ಆ ಮೀನ್ದ ಬೀಲ ಅಯಿತ ತರೆಕ್ ಕೊಲ್ಪೆರೆ ಆಪುಂಡ ಅಪಗ ಕರ್ಕ ಪಂಡ್ದ್ ಬೀಲದ ಕೊಡಿನ್ ದೆಂಜಿ ಕತ್ತೆರು. ಎಪೋಗುಲ ಆ ಮೀನ್ದ ಬೀಲ ಅಯಿತ ತರೆಕ್ ಕೊಲ್ಪುಲೇಕೋ ಇಜ್ಜಿ. ಕೊಲ್ಪೆರೆ ಈ ದೆಂಜಿ ಬುಡ್ದ್ ಕೊರಂದ್.

ಉಂದು ಲೋಕ ಕಾಪುನ ದೆಂಜಿ.